March 28, 2024

ఊహా సుందరి!

రచన: నాగులవంచ వసంత రావు

 

సృష్టికర్త ప్రతిభకు ప్రత్యక్ష రూపానివో

అమర శిల్పి జక్కన చెక్కిన శిల్పానివో

 

అవనిలోని అందమంత అమరిన జవరాలివో

రసికుల హృదయాల దోయు కొంటె నెరజాణవో

 

ఉషోదయపు మంచు తెరలు కడిగిన ముత్యానివో

శ్రీగంధపు పరిమళాల మన్మధ బాణానివో

 

ఒంపు సొంపు లొలకబోయు బాపు గీసిన బొమ్మవో

చూపరు నలరింపజేయు అచ్చ తెలుగు రెమ్మవో

 

ప్రేమ మధువు జాలువారు అమృత భాండానివో

ప్రేమాభిషేక చిరుజల్లుల అమర పాలవెల్లివో

 

రసికత రగిలింపజేయు రాకాసి పిల్లవో

కామిక హృదయాల గీయు చిలిపి అగ్గి పుల్లవో

 

ఓర చూపు వలవేసి నిండు మనసు దోచేసి

కంటి చూపుతోనే నను కర కర నమిలేస్తవో

 

సుతిమెత్తని నీ స్పర్శకు ఒళ్ళు పులకరిస్తుంది

వింత వింత లోకాలకు మనసు పరుగు తీస్తుంది

 

నడుమెంతో బంగారం నడకెంతో వయ్యారం

అలరించిన సింగారం అందానికే మణిహారం

 

చిరునవ్వుల దరహాసం మన్మధునికి పరిహాసం

ఆనందపు తీరాలకు ఆహ్వానపు సందేశం!

 

2 thoughts on “ఊహా సుందరి!

Leave a Reply to TVS SASTRY Cancel reply

Your email address will not be published. Required fields are marked *