ఆపరేషన్ పాంచాలి

రచన: శ్రీదేవి

న్యూయార్క్ నగరం: పొద్దున్నే నిద్ర లేస్తూనే పరుగుపెట్టే పోటీ ప్రపంచంలో మానవాళికి ఏదన్నా సహాయ పడాలి అనే ఉన్నత ఆశయాన్ని ఊపిరిగా చేసుకొని జీవితoతో పోరాడుతున్న యువకుడు దీప్. ఒక విదేశీ కుటుంబానికి భారతీయురాలైన పేద తల్లి చేత దత్తతకి ఇవ్వబడ్డాడు. తన ఆశయం కోసం ఎలాంటి ప్రమాదన్నయినా స్వీకరిస్తాడు అతడు. ప్రపంచమంటే గిరి గీసుకున్న నాలుగు గోడలు కాదని, కొన్ని కోట్ల హృదయాల సమ్మేళనమే అని మనస్ఫూర్తిగా నమ్మే వ్యక్తి. .
భారత దేశం: అచ్చమయిన పదహారణాల ఆడపిల్ల. విప్లవాత్మకమైన ఆలోచనలు, పుట్టుకతో ఫెమినిస్ట్. కుండబద్దలు కొట్టినట్లు మాట్లాడే మనస్తత్వం, ప్రస్తుతం చిన్న చిన్న రచనలు చేస్తూ.. గుర్తింపు కోసం ఎదురు చూస్తోంది-మహన్విత
తన పెంపుడు తల్లి ద్వారా మహన్విత గురించి తెలుసుకుంటాడు దీప్. తమ సంస్థకి గుర్తింపు రావాలంటే కొన్ని ప్రమాదకరమైన పనులు చేయాలని అది మహన్విత ద్వారా సాధ్యమని అతడి తల్లి అతడిని ఇండియాకి పంపుతుంది.
ఇండియాకి వచ్చాక మహాకి, అతడి తల్లికి ఎఫ్. బి లో తన పాత రచనల మీద జరిగిన వాగ్వివాదం గూర్చి చెప్పి సహాయానికి నిరాకరిస్తుంది మహా. ఎలాగో ఆమెను బతిమిలాడి ఒప్పించి తను వచ్చిన విషయం వివరిస్తాడు దీప్.
తనకి ఒక తీవ్రవాది అయిన 37 ఏళ్ల మహిళా జీవిత ఖైదీని ఇచ్చి పెళ్ళి చేయాలని, తద్వారా మానవతా దృక్పథంతో తను చేసిన పనికి, తమ సంస్థకు దేశ వ్యాప్తoగా గుర్తింపు కలుగుతుందని, తర్వాత నిదానంగా ఆమెకు జీవనోపాధి కల్పించి విడాకులు పొందాలని, దానికి మహా సహకరించాలని. మహా అందుకు తీవ్రంగా మండిపడుతుంది. అతడు అసహనంతో కొన్ని వారపత్రికలను ఆమె మొఖం మీద విసిరి కొడతాడు. వాటిలో మహా, తన చిన్ననాటి అభిమాన ప్రఖ్యాత విలేఖరి అయిన షామా చతుర్వేది, ఒక తీవ్రవాదిగా చేయని తప్పుకి 15 సంవత్సరాలుగా జైలు శిక్ష అనుభవిస్తోంది అని తెలుసుకుని నమ్మలేకపోతుంది. జరిగిన అన్యాయం పూర్తిగా తెలుసుకోవాలని, ఆమెను రక్షించాలని దీప్ కి సహకరిస్తానని మాట ఇస్తుంది.
అప్పటి నించి ‘ఆపరేషన్ పాంచాలి’ మొదలవుతుంది.
**************
ఇద్దరూ షామాను కలిసి పెరోలు మీద తీసుకెళతామని చెప్పగా ఆమె “మీరు ఏమి ఆశించి ఈ సహాయం చేస్తున్నారో”? అంటూ సహాయాన్ని నిరాకరిస్తుంది. వారు నచ్చచెప్పటానికి ప్రయత్నించినా ససేమిరా అంటుంది షామా. ఈ క్రమంలో దీప్ ని చాచి పెట్టి కొడుతుంది ఒక సందర్భంలో షామా. మహా కలగచేసుకొని గొడవ సర్దుబాటు చేస్తుంది.
మొత్తానికి 4 లక్షలు తన సొంత డబ్బును పెట్టుబడిగా పెట్టి షామాను పెరోలు మీద విడుదల చేయిస్తాడు దీప్. ఆమె 15 ఏళ్ళ శిక్ష కారణంగా త్వరగా కోలుకోదు. దీప్ కి ఈ విషయం కంఠకంగా మారుతుంది. ఆమెను ఎంత త్వరగా వివాహమాడి ఈ ప్రపంచానికి చూపిస్తే అంతా త్వరగా అతడి అప్పులు తీరి తమ సంస్థకి గుర్తింపు వస్తుంది. ఈ విషయం ఆమెతో చెప్పాలని అతడు శతవిధాలుగా ప్రయత్నించినా కూడా, ప్రతిసారి ఏవో అవాంతరాలు వచ్చి చెప్పలేక పోతాడు. మహా సమయం కోసం ఎదురు చూస్తూ ఉంటుంది.
ఒక పక్కన 4 లక్షల అప్పు, దాని యొక్క వడ్డీ దీప్ ని వేధిస్తుంటే మూలిగే నక్క మీద తాటి కాయ పడ్డట్లు, షామాకి బెయిల్ ఇచ్చిన లాయరు పెళ్లి నాటకం ఆమెకు చెప్తానని బెదిరిస్తుంటాడు, అంతే కాకుండా షామాకి దగ్గరవ్వటానికి శత విధాలుగా ప్రయత్నిస్తుంటాడు. మహా వాటిని అంతే సమర్ధవంతంగా చెడగొడుతూ ఉంటుంది.
కొన్ని రోజులకి షామా పూర్తిగా కోలుకొని మునుపటి సంస్థలోనే ప్రోగ్రామ్ ఎక్సెక్యూటర్ ఉద్యోగములో చేరుతుంది. పరిస్ధితి మెరుగు పడటంతో షామాకి అసలు విషయం చెప్తుంది మహా. కానీ అప్పటికే తను రిషిని ప్రేమిస్తున్నానని తనకు తిరిగి ఉద్యోగానికి సరిపడే స్థైర్యాన్ని తానే కల్పించాడని, కావాలంటే డబ్బు తిరిగి ఇస్తానని చెప్పి దీప్ ని క్షమించమని కోరుతుంది. దీప్, మహా లు ఆమె సమాధానానికి హతాశులయిపోయి, షామాను బాధ పెట్టకూడదు అని అనుకుంటారు. నిరాశతో దీప్ వేరే ప్రోజెక్ట్ కోసం బయలుదేరుతుండగా మహాకి మెరుపు లాంటి ఆలోచన వస్తుంది.
ఇద్దరు కలిసి రిషి ఇంటికి వెళ్ళి షామా కోసం చేసిన ఖర్చు చూపి వాపసు చేయమని అడుగుతారు. అతడు సంతోషంగా వారి చేతిలో 10 లక్షలు పెడతాడు. గొంతులో పచ్చి వెలగకాయ పడ్డట్లు అయ్యి వారిద్దరూ చెక్కు తో ఇంటి ముఖం పడతారు.
షామా, మహా ఇల్లు ఖాళీ చేసి వేరే ఇంటికి మారుతుంది. నిశ్చితార్థం కూడా రిషితో అంగ రంగ వైభవంగా జరుగుతుంది.
దీప్ కి డబ్బు వచ్చింది కానీ తను అనుకున్న పని అవ్వ లేదు. పైగా పది లక్షలు తీసుకోవటం అతనికి ఎందుకో మనస్కరించదు. అందుకే రిషికి చెక్కు ఇచ్చి వేయమని షామాకి చెప్పాలని, ఆమె ఇంటికి వెళ్తా డు. అక్కడ ఆమె లేదని ప్రోగ్రామ్ పని మీద MLA క్వార్టర్స్ కి వెళ్ళిందని తెలిసి అక్కడకు వెళ్తాడు.
అక్కడ.. రిషి , షామా పరిస్థితి చూసి అవాక్కు అయిపోతాడు. రిషి గాయాలతో నెత్తుటి మడుగులో అపస్మారక స్థితిలో ఉంటాడు. షామా MLA మహిధర్ వీడియోని షూట్ చేస్తూ ఉంటుంది. మహిధర్ “నేనే షామా మీద తీవ్రవాదీ అని ముద్ర వేసి 15 ఏళ్ళు జైల్ శిక్ష వేయించాను, ఆమె నా కార్యకలాపాలకు అడుగడుగునా అడ్డు పడటం నాకు నచ్చలేదు. ముఖ్యంగా భూకబ్జాల వీడియో ఎక్కడ బయట పెడుతుందో అని పధకం ప్రకారమే ఇదంతా చేశాను” అని పూస గుచ్చినట్లు చెప్పుకొస్తున్నాడు.
ఇంతలో గణగణమంటూ అంబులెన్సు, ఆ వెనుకే పోలీసుల జీపు వస్తాయి. రిషిని హుటా హుటిన తీసుకెళ్తారు వైద్య నిమిత్తం.
దీప్ షామాను చాచి పెట్టి కొడతాడు “ఇందుకేనా నిన్ను బయటకి తీసుకొచ్చింది” అంటూ.
“నీకు పది లక్షలు ఎలా వచ్చాయి దీప్?”
“ఇది నీకు ఇచ్చి వెళ్దామనే వచ్చాను”
“అది నీకు చెందిన చెక్కు, నాకెలా ఇస్తావ్”
“షామా”?
రిషి ఎవరో తెలుసా? నా చిరకాల మిత్రుడు, వాడిని నేను ఎందుకు చంపుతాను? పెరోలు కోసం మహా వచ్చినపుడు రిషి గురించి తెలుసుకొని, వాడు లాయరు అయ్యాడని తెల్సి ఆశ్చర్యపోయాను, వాడికి కబురు పంపాను. కానీ వాడి గూర్చి మీకు చెప్ప లేదు, ఎందుకంటే నా కేసు సాక్షాల సేకరణకు వాడు ఒక్కడే నాకు నమ్మకమైన వ్యక్తి, ఆ MLA శక్తి తెల్సి కావాలనే మీ ఇద్దరినీ దూరముగా ఉంచాను. వాడు తన ప్రాణాలు కూడా లెక్క చేయకుండా ఈ‌ ఆపరేషన్ ని ముందుకు తీసుకెళ్లాడు. నిశ్చితార్థం కూడా అతడిని కలవటానికి మేము ఆడిన నాటకమే.. ఈ MLA కారణంగా నా పిల్లలకి దూరం అయ్యాను. నా భర్త కూడా నన్ను అవమానించాడు, ఇప్పటికీ నన్ను గౌరవించటం లేదు, నా వృత్తిని కోల్పోయాను, నా 15 సంవత్సరాల జీవితం కోల్పోయాను.. అంటూ వివరిస్తుంది. నిస్తేజంగా షామా..
షామాను విచారణ నిమిత్తం పోలీసులు తీసుకెళ్తారు..
దీప్ మీద కదిలి పోతున్న పోలీసు జీపు పొగ చిమ్ముతూ వెళ్ళిపోతుంది.
*********************

1 thought on “ఆపరేషన్ పాంచాలి

Leave a Comment