NALEDI – ఒక బుజ్జి ఏనుగు కథ.

రచన: చక్రధర్

ఈ ప్రపంచంలో మనుషులతో పాటు ఎన్నో రకాల జంతువులు పక్షులు కీటకాలు సూక్ష్మజీవులు సముద్ర జీవులు ఉన్నాయి. దగ్గరగా ఉండి గమనిస్తే ప్రతి జీవి చేసే జీవన పోరాటం వాటి సాంఘికజీవనం ఆ జీవనంలో
ఎదురయ్యే సమస్యలు శారీరక మానసిక బాధలు అన్ని అందరికీ ఒకటే.
చూడటానికి భారీకాయులైనా మానసికంగా చాలా సున్నితమైన స్వభావం కలిగినవి ఏనుగులు. ఇవి శాకాహారులు. అనాదిగా మనిషితో స్నేహంగా ఉంటూ అతనికి ఎన్నో విధాల సాయపడిన జీవులు.
ముఖ్యంగా భారీ వస్తువుల రవాణా లో, యుద్ధాల్లో ‘గజదళం’ గా సాయపడిన ఏనుగులు, తర్వాతి కాలంలోగుళ్ళల్లో మూలవిరాట్టును ఊరేగించడానికి గుడి ఆస్థాన జంతువులుగా ఉంటున్నాయి. భారతీయ
సంస్కృతిలో ఏనుగు ని వినాయకుడు గా పూజిస్తారు.
ఆఫ్రికాలో బోట్స్వానా లో అబూ క్యాంప్ అనేది ఒక ఏనుగుల సఫారీ క్యాంప్ . సర్కస్ లో నుంచి, జూ లలోనుంచి, ఇంకా వివిధ ఇతర భయంకరపరిస్థితుల్లోంచి వచ్చిన ఏనుగులని అక్కడ పరిరక్షిన్తుంటారు. వాటి
శారీరక మానసిక స్థితిగతులను పరీక్షించి తిరిగి వాటిని ఆటవిక జీవనం కొనసాగించే దిశగా పనిచేస్తుంటారు.
ఆ క్యాంపులో కిటి అనే ఒక అనాధ ఏనుగు గర్భవతిగా ఉండి నేడో రేపో ప్రసవం అన్నట్టుగా ఉంటుంది. పర్యవేక్షణకి ఇద్దరు డాక్టర్లు వస్తారు. పుట్టబోయే ఏనుగు కోసం నలేదీ అనే పేరును సెలెక్ట్ చేస్తారు. రోజూఎదురు చూస్తున్న కిటి మాత్రం ప్రసవించదు. అలా 13 రోజులు గడిచిన తర్వాత 14వ రోజు రాత్రి ఒక బుజ్జి ఏనుగు పిల్లకి జన్మనిస్తుంది. చిన్ని తొండంతో కాళ్ళు కొట్టుకుంటూ నెలేదీ ఈ ప్రపంచంలోకి వస్తుంది.
కాసేపు అటు ఇటు దొర్లి మెల్లిగా లేచి నిలబడుతుంది. సహజ మాతృత్వంతో కిటి నలేదీని అక్కున చేర్చుకుంటుంది.
చిన్ని తోకనీ తొండాన్ని అటూ ఇటూ తిప్పుతూ బుడిబుడిగా నడుస్తున్న ఆ ఏనుగు పిల్లని చూసి అందరూ ముచ్చట పడతారు. చాల సంతోషంగా ఫీల్ అవుతారు. గత 20 సంవత్సరాలుగా అదే క్యాంపు లో పనిచేస్తున్న ఒకతను అది తన కూతురు లాంటిదని చెప్పుకొస్తాడు. అతని జీవితమంతా ఏనుగులతో పెనవేసుకు పోయింది మరి.
అలా ఏనుగుల సమూహంలోకి కొత్తగా నలేదీ చేరుతుంది. మిగతా ఏనుగులు కూడా దాన్ని బాగానే స్వీకరిస్తాయి. రోజు పొద్దున్నే ఏనుగులని అలా అడవిలో తిప్పడం సాయంత్రానికి మళ్ళీ క్యాంప్ చేరుకోవడం
జరుగుతుంటుంది. అలా ఆ ఏనుగులకి ఆటవిక వాతావరణాన్ని అలవాటు చేసి మెల్లిగా అడవులలో వదిలేస్తారు.
నలేదికంటే ముందే కిటి కి లోరటో అనే ఆడ ఏనుగు ఉంటుంది. నలెడి తన అక్కయ్య, మిగత సహచరులతో కలిసి హాయిగా ఉంటుంది.
అంతా సవ్యంగా ఉంది అనుకున్న సమయంలో హటాత్తుగా కిటి కి అనారోగ్యం సంభవించడం జరుగుతుంది. డాక్టర్ల ప్రయత్నాలు ఫలించక కిటీని కోల్పోవాల్సి వస్తుంది. అక్కడ సిబ్బందికి ఎంతో ప్రీతిపాత్రమైన కిటి
లేకపోవడం చాలా బాధాకరంగా ఉంటుంది అది చనిపోయిన విషయం వాళ్ళు నమ్మలేరు అడవి నుంచి తిరిగి వస్తుందేమో అని ఎదురు చూస్తున్నట్టుగా ఉంటారు.
ఆరు వారాల్లోనే బుజ్జి నలేది తల్లిని కోల్పోయి అనాధగా మారిపోతుంది. ఒంటరిదై పోతుంది. దాని మనసులో బాధ ఊహించరానిది. మరిచిపోలేని ఆ బాధ నుంచి అది బయట పడుతుందని ఎదురుచూస్తుంటారు సిబ్బంది.
సర్కస్ నుంచి రిస్క్ చేయబడిన ఏనుగు కేతీ తనకంటూ బిడ్డ లేకున్నా అక్కడుండే మిగతావాటికి అమ్మలాంటిది. నలేది మెల్లగా కేతీ దగ్గరకు చేరుకుంటుంది. కేతీ కూడా నలేదిని అక్కున చేర్చుకుని పాలు ఇస్తుంది. బిడ్డ లేకుండానే పాలు ఉండటం వల్ల సరిపోయినంత పాలు ఉండవు. ఆ పాలలో పోషక విల్లువలు కూడా చాల తక్కువగా ఉంటాయి. కొద్దిరోజుల్లోనే బక్కపడిపోయిన నలేదీన్ని చూసి సిబ్బందికి అర్థమైపోతుంది దానికి కావలసిన పాలు పోషకాలు అందట్లేదని. అప్పుడు దానికి ఆహారం అందించడమే సమస్య అవుతుంది. తల్లిపాలు తప్ప తాగని ఆ చిన్ని కూన సీసా పాలు ముట్టదు. సిబ్బంది చేసిన అన్ని ప్రయత్నాలు విఫలమవుతాయి. మరోవైపు తన బిడ్డ కాదు గనక కేతి నెలేదీ ని పెద్దగా పట్టించుకోదు. దాంతో శారీరకంగా,
మానసికంగా నెలెదీ చిక్కిపోతుంది. దాని కాపాడాలంటే దాన్ని గుంపు నుంచి వేరుచేసి పాలు తాగించే ప్రయత్నం చేయడం ఒక్కటే మార్గం అని సిబ్బందికి అనిపిస్తుంది. నలేదీ తీసుకుపోతుంటే మిగతా ఏనుగులు అరుస్తూ అడ్డుపడుతూ అభ్యంతర పెడతాయి, ముఖ్యంగా నెలేదీ అక్కయ్య. కాని ఎలాగోలా నలేదీ ని జీప్ లో ఎక్కించుకొని వేరే చోటుకి తీసుకెళతారు.
కొత్తగా తీసుకొచ్చిన ప్రదేశంలో ఆ చిన్న ఏనుగు నిలబడలేదు. ఏడుపు, అరుపులు, బాధ ఆక్రందన. కానీ సిబ్బంది నిస్సహాయులు. దాన్ని ఎలా పాలు తాగేట్టు చేయాలో వాళ్ళకీ తెలిదు. కాని దానికి తల్లి ప్రేమా కావాలని, అలాంటి ప్రేమని అందించగలిగితే అది పాలు తాగి బతికే అవకాశం ఉన్నదని భావిస్తారు. దాంతోనే సాంతం గడపడం, తనతోపాటే ఉంటున్నారన్న భావన కలిగించడం చేయాలి. అందుకే వాళ్లు అన్ని ప్రయత్నాలు చేస్తారు. దాన్ని ప్రేమగా చూస్తారు ఆడుకుంటారు. దాంతోపాటే రాత్రి పడుకుంటారు తాను
ఒంటరిని అన్న భావన కలిగిన మరుక్షణం అది చనిపోతుంది అని సిబ్బందికి తెలుసు. అలా దానితో ఒక అనుబంధం ఏర్పరచుకుంటే తప్ప అది మామూలు కాలేదు. దానికి కూడా మెల్లిగా వాళ్ళు తనవాళ్ళే అనే భావన కలుగుతుంది. వాళ్ళ మీద తన ప్రేమని చూపుతుంది. మెల్లిగా పాలు తాగటం మొదలు పెడుతుంది.
ఇహ సిబ్బంది ఆనందానికి అంతు లేదు. ఇలా ఆఫ్రికాఖండంలో ఇలా అనాధలై తల్లి ప్రేమ లేక చనిపోతున్న చిన్న ఏనుగులు ఎన్ని ఉన్నాయో అనేది ఆలోచనకి వస్తుంది ఆ సిబ్బందికి. ఆ పాయింట్ ని తమ రిసెర్చ్ లో పెట్టుకుంటారు. అలా రోజు నలేదీ పాలు పట్టటం,.. అలా తిప్పుకొని రావటం, ఆట పాటలటో దాన్ని మామూలుగా చేస్తారు.
అది ఇప్పుడు అందంగా ఆరోగ్యంగా తయ్యారవుతుంది. ఇప్పుడ మళ్లీ దాని ఇదివరకటి గుంపులో వదిలేయాలి. దానికోసం ఒక పథకం వేస్తారు. ఏనుగులు కొత్తవాటిని తమ గుంపులోకి తొరగా అంగీకరించవు. కానీ నలేదీ నాలుగు నెలలుగా గుంపు నించి వేరు అయింది కనక .. దాన్ని గుంపులోకి అంగీకరించటం అంత సులభం కాదు. మెల్లిగా నలేదీకి ఒక్కో ఏనుగుతో కలిపిస్తారు. మొదట్లో అక్క లోరటో, నలేదిని చూసి
దగ్గరికి రాదు. ఎదో వింత జంతువుని చూసినట్టు చూస్తుంది. కానీ రెండో రోజు, రసిక అనే మరో ఏనుగుతోకలిసి వచ్చి… నలేదిని గుర్తిస్తుంది. అలా అన్ని ఏనుగులు మెల్లిగా నలేదిని తమలో కలుపుకుంటాయి.
తొండముతో ఒకరిని ఒకరు రాసుకుంటూ ప్రేమని తెలుపుకుంటాయి. ఇదంతా వాటికీ మనకీ ఒక గొప్ప భావోద్వేగ సంఘటన.
అలా గుంపులో కలిసిన నలేది నేర్చుకోవలసింది చాలా ఉంది. ఏది తినాలి ఏది వదిలేయాలి, ఏయే జంతువులూ హానికరం, వేటితో సమస్య ఉండదు లాంటి విషయాలు ఎన్నో నేర్చుకోవాలి. గుంపు విడిచి దూరంగా వెళ్ళకుండా చూసుకోవాలి. తన అక్కయ్యల సంరక్షణలో.. నలేది హాయిగానే ఉంటుంది. కుంటల్లోజలకాలు, చిన్న జంతువులని తరుముతూ ఆడుకోవటం.. తొండం ఉపుతూ అటు ఇటు పరుగులు. మొదటి సంవత్సరం గడిచి బర్త్ డే జరిపిస్తారు సిబ్బంది. కొవ్వత్తి ఊదేసి కేకు తింటుంది నలేది. అంతా సవ్యంగా ఉంది అనుకున్న సమయంలో ఎదో అనారోగ్యంతో ఏమి తినకుండా తాగకుండా కనిపిస్తుంది. అజీర్తి, మలబద్దకం అనుకుని మందులిస్తారు. కానీ రోజులు గడుస్తున్న పరిస్థితుల్లో మార్పు రాదు. రోజురోజుకీ బలహీన పడిపోతుంది. సర్జరీ చేయటం వల్లే బ్రతికే ఛాన్స్ ఉంది. అది కూడా చాలా తక్కువ శాతం
అంటాడు డాక్టరు. డాక్టర్లు సర్జరీ కి ఏర్పాటు చేస్తారు. అందరిలోనూ ఏదో ఆందోళన, భయం. ఎం జరుగుతుందో.. చిన్నారి నలేది బతుకుతుందా లేదా ? స్వంత కూతురికి ఆపరేషన్ అయినంతగా బెంగ పడుతుంటారు.
అనస్తీషియా ఇవ్వటం అనేది మనుషులకైనా … జంతువులకైనా కొంచం ప్రమాదకరమే. కోమాలోకి వెళ్లిపోవచ్చు. కొంతం అటు ఇటు అయితే ప్రాణం పోవచ్చు. నలేదీకి అనస్తీషియా ఇస్తారు. నలేదీ శ్వాస క్రమంగా సన్నబడుతుంది. ఆక్సిజన్ పెడతారు. వివిధ రకాల మందులు వేస్తారు. మరో వైపు గుండె కొట్టుకోటానికి అదుముతుంటారు. కాని నలేదీ చడీచప్పుడు కాకుండా పడుంటుంది. అలా కొంత ప్రయత్నం తరవాత ఒక పెద్ద శ్వాస తీస్తుంది. అందరు సంతోషించి.. ఆపరేషన్ మొదలెడతారు. దాని పొట్ట నించి.. రెండు మీటర్ల పొడవున్న palm ఆకులు( ఈత జాతి) బయట పడతాయి. అది పొట్టలో చిక్కుకు పోయినందువల్లే నలేదీ అనారోగ్యం పాలైంది. ఆపరేషన్ తో దాని తీసివేస్తారు. చిన్న ఏనుగులు ఆ ఆకులని ఎక్కువగా తింటే
జీర్ణించుకోలేవు. అందుకే నలేదీకి ప్రమాదం సంభవించింది. కాని సకాలంలో గుర్తించి ఆపరేషన్ చేయటం వల్ల బతకగలిగింది. ఆపరేషన్ నించి కోలుకునే వరకు నలేదీని అడవుల్లోకి పోనివ్వరు. కానీ సాయంత్రం కాగానే
తన సహచరులు రాగానే …మళ్ళీ ఆటలు పాటలు. !!
ఒక్క ఏనుగును బతికించు కోవటానికి ఇంత కష్టమయింది. ఇలా ఏనుగులు సహజంగా జీవించడానికి ఎన్నోఅవరోధాలు ఎదుర్కోవాల్సి ఉంటుంది. అంతరించిపోతున్న అడవులు ఒకవైపు సమస్య అయితే, దంతాల
కోసం ఏనుగుల చంపేసే స్వార్థ మనుషులు మరోవైపు. కాని ఆఫ్రికా నిండా..ఆ మాటకొస్తే ప్రపంచం మొత్తం మీద దంతాల కోసం చంపపడుతున్న ఏనుగులు ఎన్నో. తుపాకులతో కాల్చి, సైనేడ్ నీళ్ళు తగించి, విషం
పూసిన బాణాలు వేసి ప్రతి రోజు ఏనుగుల్ని చంపుతూనే ఉన్నారు. నలేదీ లాంటి ఎన్నో పిల్లలని అనాధలని చేస్తూనే ఉన్నారు. ప్రతి పదిహేను నిమిషాలకి ఒక ఏనుగును కోల్పోతున్నాం. అలా సంవత్సరానికి 25వేల
నుంచి 30 వేల ఏనుగుల వరకు చనిపోతున్నాయి. మనం ఇంట్లో గర్వంగా పెట్టుకునే ఒక ఏనుగు దంతపు బొమ్మ వెనక ఒక ఏనుగు శవం ఉన్నట్టు లెక్క. ఆఫ్రికా అడవుల్లో ప్రతి కిలోమీటరు కు ఒక ఏనుగు శవం
కనపడుతోందంటే ఎంత దారుణం జరుగుతుందో ఆలోచించుకోవచ్చు. ఇప్పటికైనా మానవజాతి మేలుకొని ఏనుగు దంతాల వినియోగం నిలిపేసి , ఏనుగుల్ని చంపటం ఆపేయకపోతే .. భూమ్మీద ఏనుగు అనే అందమైన భారీ జంతువు ఉనికి మరిచిపోవాల్సి వస్తుంది.

Geoffrey Luck, Ben Bowie దర్శకత్వం వహించిన ఈ డాక్యుమెంటరీ చిత్రం అద్బుత నేపథ్య సంగీతంతో ఆకట్టుకుంటుంది. చిన్నారి నలేదీ కథ అందరికీ నచ్చుతుంది. డాక్యుమెంటరీ చిత్రమే అయినా సినిమాకి
కావలసిన అన్ని భావోద్వేగాలు ఇందులో నిండుగా ఉన్నాయి. మొదటిసారి చూడగానే నలేదీతో మనం ప్రేమలో పడిపోతాం. ముచ్చటైన నలేదీ , దాని చిలిపి వేషాలు, జీవిత పోరాటం మనలో భావోద్వేగాలు నింపుతాయి. తద్వారా ఏనుగులు ఎదుర్కొంటున్న సమస్యలు, మానవ జాతి స్వార్థం కూడా మనకి
తెలిసొస్తుంది. పిల్లలు, జంతు ప్రేమికులు తప్పకుండా చూడవలసిన చిత్రం . !!

1 thought on “NALEDI – ఒక బుజ్జి ఏనుగు కథ.

Leave a Comment