రచన, చిత్రం : కృష్ణ అశోక్
గోవులు కాచే వయసుకే
గోపెమ్మ చేతిలో చిక్కాను,
ఆమె కమ్మని కబుర్ల ముద్దలు
ప్రేమ పెదవుల ముద్దులు మొదలు..
వయసు తెలిసే వేళకే
ఓ అంకం మొదలయ్యింది…
ఒళ్ళంతా చిన్ని చిన్ని మోహాల మొలకలు
లేలేత చిగుళ్ళు వేసి పరువపు గుర్తులుగా కొంచెం కొంచెం ఎదుగుతూ…
‘పరవశం’ కి అర్ధం తెలియకుండానే
మనసు తనువు ‘పర’వశము…
తొలిరోజుల నాటిన ఆ ప్రేమమొక్క
నాతోపాటు ఎదుగుతూనే ఉంది..
ఏపుగా పెరిగిన ఆ అందాల కొమ్మల్ని
అందాలు చూపి, ఎక్కితొక్కివిరగ్గొట్టాలని కొందరు కామినుల ప్రయత్నం…
విరిగిన కొమ్మ స్థానే మరో చిగురు..
ప్రతి వసంతానా తొడిగే ఓ కొత్త చిగురు..