మాలిక పత్రిక

రచన: గిరిజా కలవల

ఆ మధ్య జలజం ఓ బీరకాయపీచు చుట్టమింటికి వెళ్ళింది. బంధుప్రీతి ఎక్కువ కదా మన జలజానికి… ఎవరినీ వదలదు.. ఆ ప్రకారం గా.. ఆ బీరకాయ పీచు ఇంటికి వెళ్ళగా… వారు సాదరంగా ఆహ్వానించి సముచిత ఆసననంబుపై ఆశీనులుకమ్మని.. తదుపరి యోగక్షేమం విచారించి… తగు ఆతిధ్యమీయ ఆ బీరకాయపీచు… ఒక ప్లేటు నిండుగా ఉల్లి పకోడీలు తెచ్చి మన జలజానికి అందించెను.
ఉల్లి వాసనకి ముక్కుపుటాలు అదిరి… నోట లాలాజలం రివ్వున ఎగసింది … వెంటనే ప్లేటు అందుకోకుండా కొంచమైనా మొహమాటపడకపోతే బావుండదని తలచి… మన జలజం..
” అయ్యో… . మా ఇంట్లో భోంచేసే బయలు దేరాను… ఇదిగో ఇప్పుడే చేయి కడుక్కున్నాను… ఒట్టు…” అనగానే…. సదరు బీరకాయ పీచు.. ఏ మాత్రం మొహమాటం లేకుండానే ” అవునా ! ఇప్పుడే భోం చేసారంటున్నారు… ఇక ఇవి ఏం తింటారులెండి..” అంటూ ఆ ప్లేటు తీసుకుని వెనుతిరిగింది.
ఆ పీచు గారి భర్త మాత్రం సహృదయులు కాబోలు…” అదేంటే… అలా అన్నంత మాత్రాన.. పెట్టవా ఏంటి?” అనగానే జలజం లో ఆశలు రేగాయి… అంతలోనే ఆయన… ” పోనీ సగం తీసేసి పెట్టు ” అన్నాడు.. భారంగా నిట్టూర్చింది జలజం…” సరే.. ” అంటు సదరు బీరకాయ పీచు ప్లేటు లో రెండంటే రెండే రెండు పకోడీలు ఉంచి మిగిలినవి తీసేసింది… పాపం జలజం.. ఏడవలేని నవ్వు ని ముఖాన పులుముకుని.. అవే పరపరా లాగించేసింది.
ఆ తర్వాత కాఫీ రాగానే….” అబ్బో.. ఇంత కాఫీయే..” అందామనుకుంది కానీ… అనకుండానే గభాల్న అందేసుకుంది.. కాదు లాగేసుకుంది.
తనకీ ఓ రోజు రాకపోదు.. అప్పుడు చెప్తా నీ పని… అంటూ కసితీరా పళ్ళు నూరుకుంది బీరకాయ పీచు ని.
ఆ తర్వాత కొన్నాళ్ళకి.. సదరు బీరకాయ పీచు… జలజం ఇంటివేపు వచ్చింది. దొరికింది బుల్ బుల్ పిట్ట అనుకుంది.
కాసేపు లోకాభిరాయాయణ అనంతరం…. జలజం ఓ ప్లేట్ లో.. ముచ్చటగా మూడంటే మూడు అరటికాయ బజ్జీ లు వేసి… బీరకాయ పీచుకి అందించింది… ఎలాగూ.. ఆ ప్లేట్ చూడకుండానే..
” అమ్మో… ఇన్నే.. కొన్ని తీసెయ్యి” అంటుందని ఊహించుకుంది… కానీ.. వెంటనే ప్లేట్ అందుకున్న..

ఆ బీ. పీ… ” వావ్… బజ్జీలే… నాకెంతో ఇష్టం ఇవి… మరీ మూడే వేసావే… ఇంకొంచెం పట్రాపోయావా?” అంది. వెర్రి మొహం వేసుకుని మన జలజం… వేడిగా బజ్జీల వాయి ఒకదాని తర్వాత మరోటి వేయించడం… బీరకాయ పీచు లాగించడం.. మొహమాటమే లేని బీరకాయ పీచు దగ్గర ఏమనలేక జలజం మొహం మాడిపోయింది . ఇంతకింతా… బీ. పీ.. దగ్గర కక్ష తీర్చుకుందామనుకున్న జలజానికి బి. పీ పెరిగిపోయింది పాపం..