రచన: సురేఖ దేవళ్ల
చిన్నగా పడుతున్న చిరుజల్లులను, మాకోసం మరింత తొందరగా మా దగ్గరకు చేరుకో అంటూ తమ కదలిక ద్వారా సంకేతాన్ని అందిస్తున్న అందమైన ఆకుపచ్చని మొక్కలతో,
అప్పుడప్పడే విచ్చుకుంటూ తమ సోయగంతో పరిమళాలను వెదజల్లుతూ చూపరుల నయనాలనే కాకుండా మనసును కూడా వాటివైపు మరిలేలా చేస్తున్న సన్నజాజుల అల్లరితో ఆ సాయంత్రం చాలా అందంగా, ఆహ్లాదంగా ఉంది.
ఆ సాయంత్రపు ప్రకృతి కంటే అందంగా సింగారించుకుని బంగారుబొమ్మలాంటి కుందన తన భర్త హేమంత్ కోసం ఎదురుచూస్తోంది.
ఆ ఎదురుచూపులు విసుగు కలిగించకుండా సన్నజాజి తీగ తన అల్లరితో తనకు చేరువగా ఉన్న ఆమె మోమును తాకి ఆమె ధ్యాసను తనవైపు తిప్పుకుంది.
నీ చిలిపితనం నాకు అర్థం అయ్యిందిలే అన్నట్లుగా దానివైపు చూసి నవ్వి “రోజూ నాకెన్నో పూలను ఇస్తావు, అయినా మరికొన్నింటిని నేను కోయకుండా నీలోనే దాచేసుకుని నాకు నయనానందం కలిగిస్తావు” అంటూ తన నేస్తమైన సన్నజాజి తీగకు కబుర్లు చెప్తున్న కుందన దగ్గరకు హేమంత్ వచ్చి . .
“అయ్యాయా మీ కబుర్లు, ఇక దేవిగారి మనసు ఇటు మరల్చవలసిందిగా ఈ దీనుని విన్నపం” అన్నాడు.
ఆ మాటలు విని కిలకిలా నవ్వేసింది కుందన. .
మీకోసమే వెయిట్ చేస్తున్నా, రండి . అంటూ లోపలికి నడిచింది కుందన.
హేమంత్ ఫ్రెష్ అయ్యి వచ్చేసరికి వేడివేడి బజ్జీలు రెడీ చేసింది.
ఇద్దరూ కలిసి తింటూ కబుర్లు చెప్పుకుంటున్నారు.
రేపు మీ పుట్టినరోజు కదా, ఏం ప్లాన్ చేశారు అంది కుందన.
ఆఫీస్ లో ఫ్రెండ్స్ పార్టీ కావాలని గోల చేసేస్తున్నారు. కాబట్టి బయట వాళ్ళకి పార్టీ ఇద్దాం ఫ్యామిలీలతో. అన్నాడు హేమంత్.
సరే,మీ ఇష్టం అంది కుందన.
*******
“నిన్న పార్టీ బాగుందని మావాళ్ళందరూ ఒకటే పొగడ్తలు. నిజంగా ఫుల్ హ్యాపీ ” అన్నాడు హేమంత్.
“అవునా,గుడ్ గుడ్. మీకు ఈ వీకెండ్ ఏమైనా పనులున్నాయా. ” అడిగింది కుందన.
ఎందుకో చెప్పు ఫస్ట్. అన్నాడు హేమంత్.
“ఆదివారం మొత్తం మీరు నాతోనే ఉండాలి. మనం ఒకచోటుకి వెళ్ళబోతున్నాం ” అంది కుందన.
“అవునా,ఎక్కడికి. మళ్ళీ హనీమూన్ ఆ, నాకు ఓకే ” అన్నాడు హేమంత్ కొంటెగా. .
“అబ్బా, చాల్లే. అదేంకాదు. ఎక్కడికి అనేది సస్పెన్స్. ” అంది కుందన నవ్వేస్తూ. .
సరే శ్రీమతిగారు అంటూ దగ్గరకు తీసుకున్నాడు భార్యని.
౦౦౦౦౦
“ఇక్కడ వాతావరణం చాలా బాగుంది ప్రశాంతంగా . . . ఎవరిల్లు ఇది “అన్నాడు
హేమంత్.
కుందన నవ్వుతూ “తినబోతూ రుచెందుకు అడుగుతున్నారు, పదండి లోపలకు ” అంటూ లోపలికి దారితీసింది.
రకరకాల సందేహాలతో లోపలికి వెళ్ళాడు.
ఆ ఇల్లు చుట్టూ పళ్ళ మొక్కలు,పూల మొక్కలతో చాలా బాగుంది.
ఇల్లు కూడా సింపుల్ గా బాగుంది.
హేమంత్ ని హాల్లో కూర్చోపెట్టి కళ్ళకు గంతలు కట్టింది కుందన.
ఏయ్,ఏంటిది అన్నాడు హేమంత్.
ఒక్క ఐదు నిమిషాలు శ్రీవారు,ప్లీజ్. నేను చెప్పేవరకు తీయొద్దు అని రిక్వెస్ట్ చేసింది కుందన.
సరే అన్నాడు హేమంత్ వేరే దారిలేక.
ఒక మూడు నిమిషాలకు” ఒకసారి నోరు తెరవండి శ్రీవారూ “అంది కుందన. .
నోరు తెరిచిన హేమంత్, ఆ పదార్థం రుచి చూడగానే ఒక్కసారిగా అమ్మా అంటూ సంతోషంతో కళ్ళగంతలు తీసేశాడు.
ఎదురుగా నిలబడిన వాళ్ళమ్మని కౌగలించుకుని ఏడ్చేసాడు.
తమ ప్రేమ పెళ్ళితో విడిపోయిన ఆ తల్లీకొడుకులు ఇప్పుడు ఇలా ఒకటవటం చూసి చాలా సంతోషపడింది కుందన.
కొడుకుతో పాటు కోడలిని కూడా దగ్గరకు తీసుకున్నారు హేమంత్ వాళ్ళమ్మగారు.
నాన్నగారికి కోపం తగ్గలేదు రా, ఆయన కోపం తగ్గే వరకు నేనే వచ్చి వెళుతూ ఉంటాను. ఈ ఇల్లు మా ఫ్రెండ్ ది.
కుందన చాలా మంచి అమ్మాయి.
ఈకాలంలో ఏ అమ్మాయైనా అత్తమామలుతో కాకుండా విడిగా ఉండాలని పోట్లాడి మరీ వెళ్ళిపోతున్నారు. .
అటువంటిది నన్ను ఇక్కడికి తీసుకుని రావటానికి చాలా కష్టపడింది.
తనను బాగా చూసుకో, తన మనసు ఎప్పుడూ కష్టపెట్టకు.
అర్థం అయ్యిందా అన్నారు హేమంత్ అమ్మ.
తప్పకుండా అమ్మా అన్నాడు హేమంత్.
ఆవిడ వెళ్ళిపోయారు మళ్ళీ కలుస్తా అంటూ.
మీ పుట్టినరోజుకి లేట్ గా ఇచ్చిన నా ప్రేమకానుక. నచ్చిందా. . అంది కుందన.
“థాంక్యూ సో మచ్ కన్నా. చాలా చాలా నచ్చింది. ఐ లవ్ యూ సో మచ్ రా. నాకు చాలా సంతోషంగా ఉంది. తొందరలోనే నాన్న కూడా మనసు మార్చుకుంటారని నా నమ్మకం ” అన్నాడు హేమంత్.
“తప్పకుండా మనల్ని అర్థం చేసుకుని, మనతో సంతోషంగా గడిపే రోజు వస్తుంది” అంది కుందన.
ఆమెను ప్రేమగా దగ్గరకు తీసుకొని నుదిటిపై ముద్దు పెట్టుకున్నాడు హేమంత్.
౦౦౦౦౦౦౦
“రేపు మనం ఊరెళుతున్నాం, అత్తయ్యా వాళ్ళ దగ్గరకు. బట్టలు సర్దు. వారం రోజులు అక్కడే ఉంటాం” అన్నాడు హేమంత్.
‘ఏంటి సడెన్ గా’. అడిగింది కుందన కొంచెం ఆశ్చర్యంగా, కొంచెం సంతోషంగా.
“నాకు కొంచెం పనుంది అటువైపు, ఎలాగూ వెళతా కదా . నువ్వు వస్తావని. మన పెళ్ళికి మీ వాళ్ళు ఒప్పుకున్నా, నాతో ముభావంగా ఉంటున్నారని పుట్టింటికి వెళ్ళడమే మానేసావు ఈమధ్య.
కానీ,మనసులో అయినా ఉంటుంది కదా కన్నవాళ్ళని చూడాలని.
అందుకే ఈ ప్రయాణం” అన్నాడు హేమంత్.
ఆ మాటలకు కళ్ళల్లో నీరు తిరుగుతుండగా ప్రేమగా అతనివైపు చూసింది.
ప్రేమను చెప్పడానికి ప్రతిసారీ భాష అవసరం లేదు.
********
పుట్టింటికి వచ్చిన కూతురిని చూసి చాలా సంతోషపడ్డారు కుందన తల్లిదండ్రులు.
హేమంత్ ని కూడా బాగా రిసీవ్ చేసుకున్నారు.
ఆ మర్నాడు బయటికి వెళ్దాం అంటూ తీసుకుని వెళ్ళాడు హేమంత్.
“ఇటువైపు మా స్కూల్ ఉంటుంది” అంది కుందన ఆ దారి చూసి.
అవునా అన్నాడు హేమంత్ నవ్వాపుకుంటూ.
సరిగ్గా స్కూల్ దగ్గరకు వచ్చేసరికి బైక్ ఆపాడు హేమంత్.
ఇదేంటి ఇక్కడ ఆపారు. అయోమయంగా అడిగింది కుందన.
ఏం లేదు, నా ప్రియసఖి చదివిన స్కూల్ ఎలా ఉందో చూద్దామని అన్నాడు కొంటెగా.
చాలు చాలు అంటూనే సిగ్గు పడింది కుందన.
స్కూల్ లోపలికి వెళుతూనే అక్కడ చూసి షాకయ్యింది.
తన బెస్ట్ ఫ్రెండ్ అయిన మాలిని అక్కడ ఉంది.
కుందనని చూస్తూనే సంతోషంతో దగ్గరకు వచ్చి హగ్ చేసుకుంది.
ఇద్దరూ మాట్లాడుకుంటూ లోపలికి వెళ్ళేసరికి దాదాపు ఎనభై మంది వరకు ఉన్న అందరూ” హాయ్ కుందనా” అంటూ అరిచేశారు.
అందరినీ చూసి ఆశ్చర్యపోయింది కుందన.
పట్టలేని సంతోషంతో మాటలు రావడంలేదు కుందనకి.
సాయంత్రం వరకు చాలా సరదాగా గడిపేశారు ఆటపాటలతో, తీపి జ్ఞాపకాలను గుర్తు చేసుకుంటూ, జీవితాంతం గుర్తుండిపోయే ఒక మధురమైన జ్ఞాపకంగా వారి మనసుల్లో ముద్రించుకున్నారు.
కొంచెం బాధతో, ఎక్కువ సంతోషంతో అందరూ ఒకరికొకరు వీడ్కోలు చెప్పుకుని వెళ్ళిపోయారు.
చివరికి హేమంత్, కుందన,మాలిని మిగిలారు.
అందరూ కుందన వాళ్ళింటికి వెళ్ళారు.
అందరి కుశలప్రశ్నలు అయ్యాకా డాబామీదకి చేరారు ముగ్గురు.
“థాంక్యూ సో మచ్ మాలిని. ఇలా అందరినీ కలవడం చాలా సంతోషంగా ఉంది ” అంది కుందన.
“ఈ సర్ప్రైజ్ మీ శ్రీవారి ప్లాన్. రెండు నెలల నుండి కష్టపడుతున్నారు అందరినీ ఒకచోటికి చేర్చడానికి హేమంత్ చాలా కష్టపడ్డారు.
ఎక్కడెక్కడో ఉన్నవారి అడ్రస్ లు కనుక్కుని, అందర్నీ ఒకచోటికి చేర్చారు.
నీ పొగడ్తలు ఏమైనా ఉంటే అవి మీ ఆయనకే చెందుతాయి ” అంది మాలిని.
అవునా అంటూ ఆశ్చర్యంగా చూసింది కుందన.
నవ్వుతూ చూశాడు హేమంత్.
కొద్దిసేపు మాట్లాడుకున్నాక అక్కడే భోంచేసి. .
“సరేనే మళ్ళీ కలుద్దాం, ఇకనుంచి టచ్ లో ఉందాం” అంటూ శెలవు తీసుకుంది మాలిని.
డాబామీదకి చేరారు ఆ దంపతులు.
“థాంక్యూ సో మచ్ శ్రీవారు. నాకు ఇంతకన్నా చెప్పడానికి మాటలు రావడం లేదు ” అంది కుందన.
“మాటలు అవసరం లేదు,నీ కళ్ళే చెబుతున్నాయి నువ్వు ఎంత సంతోషంగా ఉన్నావో. ” అన్నాడు ప్రేమగా హేమంత్.
ఒకరికొకరు ఇచ్చుకున్న ఆ ప్రేమకానుకలు గురించి చర్చించుకుంటూ, వాటికోసం తాము చేసిన ప్రయత్నాలను చెప్పుకుంటూ ఆ అందమైన వెన్నెల రాత్రిని మరింత అందంగా మార్చుకున్నారు.