అంతర్యుద్ధం

రచన: మూలా వీరేశ్వరరావు

పుట్టక ముందే
ఎదో పెద్ద కుట్ర జరిగింది !
జాతి అని, మతమని, కులమని, లింగమని
నా మీద ముద్ర వేశారు !
నన్ను నేను చూసే అవకాశం లేదు !
చదువేదో మొదలయ్యాక
ఇప్పుడు 90 శాతం 30 శాతం
ఒకే చోట కూర్చునే అనివార్య స్థితి
అంతర్యుద్దానికి సిద్ధం చేస్తుంది !
జంధ్యం పోగు,మాంసము పేగు
పెనవేసుకొని సాగే పరిస్థితి !
కులాల కొలనులో
కలహాల అలలు !
సామాజిక న్యాయం
జరగని నెత్తురోడే పచ్చి గాయం !
దేశీయ పక్షులకు ఎన్నో రకాలుగా “రాజకీయ గాలి” ఎదురు దెబ్బ కొడుతోంది
వలస పోయిన పక్షుల మేధస్సు
స్టాట్యూ ఆఫ్ లిబర్టీకి మోకరిల్లుతుంది !
జీవితం నుండి పారిపోలేని జీవన విహంగం
పంజరాన్నీ ప్రేమిస్తోంది !

******

రాళ్ళకి మొక్కే రీతి
అవినీతిలో భాగం పంచే శీఘ్ర గతి
మొక్కిన వరమీయని వేలుపు
రోజూ లౌడ్ స్పీకర్ నుండి మౌఢ్యానికి మేలుకొలుపు !
జీవితం చుట్టూ వాస్తు,గ్రహాల విషవలయాలు
మళ్లీ మళ్ళీ మోసపోయే సుడిగుండాలు
ఆదివారం ఆత్మ గౌరవం వంచనతో
మతమేదో మారి పోతుంది
సిలువ ధరించిన కుహనా గౌరవం
కొత్త ” విత్తం”కి విత్తనాలు చల్లు తుంది !

మత కమతంలో
కుల వ్యాకుల వ్యాపారంలో
మానవత్వం చిరునామా లేని ధరిత్రి గా మిగులుతుంది !

****

పెట్టుబడి, లాభం
మా నిఘంటువులో ఎప్పడు దొర్లే పదాలు
విశ్వవిపణిలో ప్రపంచం చిన్నదైనది
వంచన పెద్దదైనది
సాంకేతిక మోసంతో సున్నితంగా పీక తెగుతూ ఉంటుంది !
నమ్మకాలు నరకానికి రహదారులవుతాయి
స్విస్ సర్పం ఎప్పటి లాగే బలిసి బుసలు కొడుతూ ఉంటుంది !
క్షణాలన్నీ వస్తు క్షణికాలుగా మారుతుంటాయి
విలువలన్నీ విడిచిన సమాజం
ఒక ప్రాచీన శిధిలాలయమవుతుంది
హృదయమున్న వాడు ఉరి లేని పూజారవుతాడు !

జీవితపుటంచులు

 

రచన: మూల వీరేశ్వరరావు

 

 

అంచుల దాక

వచ్చాక

అంచనాలు ఎందుకు ?

అంచుల దగ్గర

అర్దాల వెతుకు లాట

అర్ధ రహితం !

గతం జైలులో

జ్జాపకాల సంకెళ్ళేసుకున్న

మనో విహంగానికి

రెక్కలు ఏవి ?

మతంతో

మతి తప్పిన మర్కటాలకు

జీవిత మార్మికత ఏలా

తెలుస్తుంది ?

కొలతలతో

వెతలు చెందే వాడికి

జీవితం ఉత్సవ మని ఎప్పుడు

అవగతమవుతుంది ?

,

మిత్రమా

రా

కాంతి రహదారిపై

ముద్రలు లేని మతితో

వేల్పులు లేని హ్రుదితో

అన్వేషణా ఆత్మతో

జీవితమప్పుడు

జ్ఞాన సౌందర్యమవుతుంది !