వాణి కొరటమద్ది
తరువులన్ని కొత్తచిగురు తొడుగుతాయి ఆమనిలో
ప్రతిమదిలొ పులకింతలు రేపుతాయి ఆమనిలో ||
సుఖ దు:ఖాల సత్యాలు విడమరచి ప్రబోదించి
సంసృతికి ప్రణామాలు పలుకుతాయి ఆమనిలో ||
వేపపువ్వు పచ్చడితో షడ్రుచులూ మేళవించి
ఆరుఋతువుల అర్ధాలనె చాటుతాయి ఆమనిలో ||
విరబూసిన విరికన్నెలు మకరందం నింపుకుంటు
వసంతుడినె ఆగమనము కోరుతాయి ఆమనిలో ||
మధురమైన అనుభూతితొ మనసుకెంత ఉల్లాసమో
మధువునిండి పుష్పములే నవ్వుతాయి ఆమనిలో ||
మధుమాసపు సొబగులన్ని ఆహ్వానము ప్రకటిస్తూ
చిగురాశలు చిలుకరిస్తు వచ్చినాయి ఆమనిలో ||
ఆకురాలి ప్రతిచెట్టూ చివురాకులు అలవరించి
కోయిలలకు స్వాగతాలు పలుకుతాయి ఆమనిలో||
విరిసివున్న పువ్వులపై నవ్వుకుంటు భ్రమరాలు
మధువునంత జుర్రుకోగ వాలుతాయి ఆమనిలో ||
సిరిమల్లెలు పరిమళాలు వెదజల్లును వనమంతా
మగువసిగన మురవాలని కులుకుతాయి ఆమనిలో||
భావాలే పూయిస్తూ వసంతాల సొగసులన్ని
మౌన ‘వాణి’ కవనంలో నిండినాయి ఆమనిలో ||