మాలిక పత్రిక

 

చాలా ఏళ్ళ క్రితం తెలుగు వార, మాస పత్రికల్లో ‘శ్రీవల్లి’ పేరుతో కార్టూన్లు వస్తుండేవి.  కార్టూన్ల హవా బాగా వెలిగిపోయిన, కార్టూనిస్టులు తామరతంపరగా పుట్టుకొచ్చిన రోజులవి.  అయితే ఇంతమందిలో కూడా శ్రీవల్లి కార్టూన్లు చాలామంది పాఠకులకు గుర్తుండిపోయాయి!

 

కార్టూన్ గీత లావుగానూ,  హాస్యస్ఫోరకంగానూ ఉండటం, విభిన్నమైన కోణాన్నుంచి అల్లరిగా దూసుకొచ్చే హాస్యధోరణి , సంతకం కూడా ప్రత్యేకంగా ఉండటం-  ఇవన్నీ దీనికి కారణాలు కావొచ్చు. బొమ్మకి ప్రాధాన్యం ఇస్తూ కాప్షన్ తక్కువుండేలా ప్రయత్నించటం,  సామాజిక స్పృహ ను జోడించినప్పటికీ  ‘స్పార్క్’ మిస్ కానివ్వకపోవటం ఈ కార్టూనిస్టులో కనపడే లక్షణాలు.

 

‘శ్రీవల్లి’ పేరును చూసి లేడీ కార్టూనిస్టుగా పొరబడే అవకాశముంది. అసలు పేరు పోలిశెట్టి వీరభద్రరావు.  తూర్పు గోదావరి జిల్లా అమలాపురంలో  పుట్టిపెరిగి, కార్టూనిస్టుగా ఎదిగాడు.  హైదరాబాదులో ఓ పత్రికలో ఆర్టిస్టుగా స్థిరపడ్డాడు.  ఓ ప్రముఖ దినపత్రిక  హైదరాబాద్ సిటీ ఎడిషన్లో  రాజకీయ, సామాజిక అంశాలతో చాలా కార్టూన్లు వేశాడు.

 

శ్రీవల్లి  ‘కుంచె’ పేరు వెనక కథేమిటి? అతడి మాటల్లోనే విందాం. ‘మా అన్నయ్య కూతురు ఓ గడుగ్గాయి ఉండేది. ఆమె పేరే శ్రీవల్లి. ఆ పేరుతోనే కార్టూన్స్ మొదలుపెట్టి తర్వాత నా అసలు పేరుకి మార్చుకుందాం అనుకున్నాను. కానీ అందరూ ఆ పేరే బాగుందనడం- సంతకం కూడా డిఫరెంట్ గా ఉంటుందీ- మార్పు వద్దనడంతో శ్రీవల్లిగానే కంటిన్యూ అయ్యాను.’

మొట్టమొదటి కార్టూన్

20 సంవత్సరాల క్రితం, 1981లో  ఆంధ్ర సచిత్రవార పత్రికలో అతడి  తొలి కార్టూన్ వచ్చింది.  అప్పటి నుంచీ ఉత్సాహంగా  ఎన్నో పత్రికల్లో వేల కార్టూన్లు వేశాడు.  పోలీసులు, హేర్ కటింగ్ సెలూన్లు, డాక్టర్లు, రాజకీయ నాయకులు, పోస్టుబాక్సులు, దొంగలు, పేదలు, బిచ్చగాళ్ళు, బాబాలు, మగ, ఆడవాళ్ళ మనస్తత్వాలు.. నిత్యజీవితంతో సంబంధమున్న ఇలాంటి అంశాలే ఇతడి కార్టూన్లకు ముడిసరుకులయ్యాయి.

‘నవ్వు ! నవ్వించు!! ’ అనే పేరుతో కార్టూన్ల సంకలనం 12 ఏళ్ళక్రితం వెలువరించాడు. వేల కార్టూన్లలోంచి ఎంపిక చేసిన కొన్నిటికి మాత్రమే ఈ పుస్తకంలో స్థానం కల్పించాడు.

 

హాస్య చిత్రాలకు చిరునామా అయిన జంధ్యాల ఈ కార్టూన్లను (చవి) చూసి అభినందించారు. ‘కొన్ని ఆకర్షణీయమైన గీతల్నీ, కొన్ని అందమైన రాతల్నీ కలబోసి చక్కని బొమ్మల్నీ, చిక్కని హాస్యాన్నీ చిలికించిన శ్రీవల్లికి నా అభినందనలు’ అని వెన్నుతట్టారు.

సినీ సంభాషణల ‘పన్’డితుడు తనికెళ్ళ భరణి అభిప్రాయంలో ‘అతని కుంచె అడుగున ఓ గుండుసూది కూడా ఉంది. అది బావుంది!’

 

ప్రతిరోజూ  ‘ఇదీ సంగతి’ అంటూ రాజకీయనేతలకు చురకలు పెట్టే ఈనాడు కార్టూనిస్టు శ్రీధర్  ‘ఊహించని సబ్జెక్టులపై వేశాడు. అబ్బురపడతాం’ అని  శ్రీవల్లి కార్టూన్లను  మెచ్చుకున్నారు.

ఈ కార్టూన్ల  సంకలనం విడుదలయ్యేనాటికే  కార్టూన్లకు ముఖం చాటుచెయ్యటం మొదలుపెట్టాయి పత్రికలు.  కార్లూన్ల స్థలాన్ని గాలి రాతల గాసిప్పులూ,  అశ్లీల ఛాయా చిత్రాలూ దురాక్రమించేశాయి.  ఇంకా ముందుకెళ్ళి కథల,  సీరియల్స్ స్థలంలోకి కూడా  అవి చొచ్చుకెళ్ళిపోయాయనుకోండీ!  కార్టూనిస్టుల సంగతి సరే,  కార్టూన్ ఇష్టుల సంగతిని కూడా  పట్టించుకోలేదు  పత్రికా సంపాదకులు.  దీంతో ఎంతోమంది కార్టూనిస్టులు  అస్త్ర సన్యాసం చేశారు.  వారిలో శ్రీవల్లి  కూడా ఉన్నాడు!

అసలు  తెలుగు పత్రికారంగంలో కార్టూన్ల అధ్యాయం 1992 తోనే ముగిసిందంటాడు శ్రీవల్లి.  ‘శాటిలైట్ ఛానల్స్ తోనే పత్రికల  పతనం ప్రారంభమైంది. 1995కి రీజినల్ చానల్స్ వచ్చాక నెలకు 50 నుంచి వంద ఇస్తే కాలక్షేపం 24 గంటలూ చూపిస్తున్నపుడు ప్రజల్లో పత్రికలు కొని చదవాల్సిన అవసరం, చదివేంత టైం కూడా లేకపోయింది.’… అంటాడు.  అందుకే క్రమంగా కార్టూన్లు వేయటం తగ్గించేశాడు. అలా దీర్ఘ విరామం వచ్చింది.

సరదా ధోరణి

కార్టూనిస్టులందరూ సరదాగా ఉండరు. కొండొకచో సీరియస్ గానూ ఉంటారు.  కానీ శ్రీవల్లి తన సుతిమెత్తని చురుకైన వ్యంగ్య వ్యాఖ్యలతో చుట్టూ ఉండే వాతావరణాన్ని తేలికపరుస్తుంటాడు.  ఎంతటి  సీరియస్ సందర్భాన్ని అయినా ఛలోక్తుల జల్లుతో హాస్యభరితం చేయటం ఇతడి ధోరణి.  జర్నలిస్టులూ, ఆర్టిస్టుల గురించీ,  పత్రికల గురించీ, వివిధ వ్యక్తుల మ్యానరిజమ్స్ గురించీ  ఇతడు  పేల్చే ఇన్ స్టంట్ జోకులు బోలెడు నవ్వులు కురిపిస్తుంటాయి.

 

కార్టూన్ విరామానికి సెలవిచ్చి, మళ్ళీ విరివిగా కార్టూన్లు వేయటం మొదలుపెట్టాలని  శ్రీవల్లి చాలాకాలంగా అనుకుంటున్నాడు.  ఆ ఆకాంక్షను ఇప్పుడు ఆచరణలో పెట్టేశాడు కూడా…  ‘మాలిక పత్రిక’ కోసం తాజాగా వేసిన ఈ కార్టూన్లతో!

 

శ్రీవల్లి ఈ-మెయిల్ : raopvb@yahoo.com

 

—————————————————-