క్రింద ఇచ్చిన పద్యమును చదవండి. ఇందులో గొప్పగా కవిత్వము ఏమియు లేదు. ఇది నిజముగా ఒక సమస్య. ఇది సీస పద్యము; సీసము పిదప గల ఆటవెలదికి కూడ సీసపద్యపు లక్షణములు గలవు. ఆటవెలది పాదములను 5, 6 పాదములుగా పరిగణించుకొనవలయును. పాదముల సంఖ్యను పాదముల ముందు ఇచ్చియున్నాను. ఈ పద్యములో ఏ అక్షరమునైనను మీరు తలచుకొని, ఆ అక్షరము ఏయే పాదములలో ఉన్నవో నాకు తెలిపిన మీరు తలచిన అక్షరమును నేను మీకు తెలుపగలను. అనగా ఆఱు పాదములలో ఏ ఏ పాదములలో మీరు తలచుకొనిన అక్షరములు గలవో తెలుప మనవి. కొన్ని నియమమములు-
1. హల్లులను మాత్రమే మీరు ఎన్నుకొనవలయును.
2. 31 హల్లులకు మాత్రమే మీ ఎన్నిక పరిమితము.
3. ఙ, ఞ లను తలచుకొనరాదు.
4. ల, ళ లు సమానము.
5. ర, ఱ లు సమానము.
6. క్ష క మఱియు షల సంయుక్తాక్షరముగా పరిగణించబడును.
7. సంయుక్తాక్షరములలో మొదటి అక్షరమునకు మాత్రమే విలువ. అనగా క్తి అను అక్షరము క-కారముగా పరిగణించబడును.
ఈ సమస్య వెనుక గల గణితశాస్త్ర సిద్ధాంతములను రాబోవు సంచికలో మీకు విశదీకరించెదను. అందఱును ఇందులో పాల్గొని దీనిని జయప్రదముగా చేయ ప్రార్థన. మీరు ఎంచుకొన్న అక్షరములు ఏయే పాదములలో నున్నవని నా ఈ-మెయిలుకు పంపండి. మీకు నేను జవాబును పంపుతాను. రాబోయే సంచికలో మీ పేరులను, మీరు ఎంచుకొనిన అక్షరములను తెలుపుతాను.
నా మెయిల్ ఐడి: jkmrao@yahoo.com
ఇక పద్యము-
సీసము-
1) మన భాష గాథలు – మనకిచ్చు ఘనకీర్తి,
భారతిన్ బొగడుగా – నూరు హృదులు,
2) హృదయ మక్కటికమ్ము, – చిదమర శిఖరమ్ము,
ఫక్కియు నజడమ్ము – వరద కెపుడు,
3) మసృణపు ఝరులాయె, – మతి కింపు శ్రుతు లౌర,
మృష లేని జిగి క్రొత్త – మెఱపు ఛాయ,
4) సభలోన గఠినమ్ము – సఫల మవగ వాంఛ,
జయమది జగదంబ – చలువ విధిగ,
ఆటవెలది-
5) పృథివియందు దృఢిమ – బ్రియమార బిల్తు, స-
ద్వీణ మీటెడు విధి – రాణి సతము,
6) నన్ను గనుమ యమ్మ – నలువదేవుని గొమ్మ,
నిన్ను గొలుతు నమ్మ – నిజము నమ్ము.
(కొన్ని పదములకు అర్థము: గాథ – పద్యము, చరిత్ర; అక్కటికము – కనికరము; ఫక్కి – విధము, రీతి; అజడము – తెలివి; మసృణము – చక్కనిది; ఝరి – సెలయేఱు; మృష – అసత్యము; జిగి – కాంతి; దృఢిమ – గట్టిదనము)
నమస్కారంంకృష్ణమోహను గారు . మాలికలో చాలా విలువైన సమాచారం వుంది. ఇన్నిరోజులు నేను చూడలేదు. ముఖ్యంగా పద్యాల గురించి చాలా వివరణ వుంది. మీరు భాషకోసం చేస్తున్న కృషికి హృదయపూర్వక అభినందనలు.