రచన: శ్రీనివాస భరద్వాజ్ కిషోర్
ఎక్కువ చపలత్వముతో
చిక్కినవన్నిటిని తినగ జీవితమంతా
చక్కెర చూడగ మెల్లగ
చిక్కును రుధిరమ్మునందు చేదునిజమిదే
బియ్యం ముతకది తిన్నా
తియ్యదనము వైపు ముఖము తిప్పకయున్నా
నెయ్యన్నా వలదన్నా
కయ్యబడుతు ఉడకబెట్టి కాయలె తిన్నా
ముదనష్టపు రోగమ్మది
వదలదు మనలను సుళువుగ వచ్చిందంటే
మదికెంతో క్షోభకలుగు
పదిరకముల మందులుతిను బతుకైపోవున్
పట్టినచో మధుమేహము
పుట్టగనే కర్మగాలి పూరువ జన్మన్
తిట్టుకొనుచు ఇనుసులినును
గట్టిగ గుచ్చేసుకొనుచు గడిపేయవలెన్
తగ్గించవలయు కార్బులు
పగ్గము వేయగవలయును బైటతినుటకున్
నిగ్గడియౌ వ్యాయామపు
అగ్గి కలిగియుండవలయు నది నిజమెరుగన్
మక్కువతో ప్రతిరోజూ
ఎక్కిన నడిపించు యంత్ర మెడతెగకుండా
చక్కబడేనారోగ్యము
తక్కువగయ్యేను బరువు తగ్గును షుగరున్
చక్కని యీ మాటలు మది
కెక్కకపోతే మరియిక యేడువవలయున్
చిక్కితివిక రారాయని
చక్కెర తన మహిమజూపు చంపును మనలన్