రచన – వేణు
బాపు కార్టూన్లలో నాలుగో, పదో, ఇరవయ్యో చూపించేసి ‘ఇవి బెస్ట్’ అనెయ్యటమా? ‘హెంత ధైర్యం?’ అని ఎవరికైనా కోపాలొచ్చేస్తే అది వారి తప్పేమీ కాదు.
కానీ ‘నాకు నచ్చిన తెలుగు కార్టూన్లేమిటబ్బా!’ అని ఆలోచించి చూస్తే ఎక్కువ గుర్తొచ్చినవి బాపువే! మిగిలిన కార్టూనిస్టులవి కూడా కలిపేసి కలగూరగంపగా ఇచ్చే కంటే… కొంటె నవ్వులు చిలికించే బాపు కార్టూన్లలో కొన్నింటిని ఎంచుకుని ఓసారి తల్చుకుంటే బాగుంటుందనిపించింది.
బాపు గీసిన వందల వేల కార్టూన్లలో ‘అత్యుత్తమం’ అంటూ కొన్నిటిని ఎంచటం ఎవరికైనా కష్టమే. విశాలాంధ్ర వారు ప్రచురించిన బాపు కార్టూన్ల పుస్తకాల్లోని పేజీలను తిప్పుతూ ట్రాఫిక్ సిగ్నల్స్ లా నిలబెట్టేసే కార్టూన్లను నోట్ చేస్తుంటే పొడుగాటి జాబితా తయారవుతూ వచ్చింది. నిర్దాక్షిణ్యంగా షార్ట్ లిస్టు చేయటానికి కొంత ప్రయాస పడాల్సివచ్చింది.
గుర్తొస్తే చాలు… దరహాసాల, పరిహాసాల పరిమళాలు వెదజల్లే కార్టూన్లు కొన్నే ఉంటాయి. వీటికి కాలదోషం అంటదు. ఏళ్ళు గడిచినా గిలిగింతలు పెట్టే లక్షణాన్ని ప్రమాణంగా పెట్టుకుని ఆ రకంగా నాకు అమితంగా నచ్చిన వాటిలో తగ్గించి తగ్గించి ఎంచుకుంటే చివరకవి తొమ్మిదిగా తేలాయి. ‘టాప్ టెన్’అవటం కోసం మరొక్కటి చేరుద్దామంటే… మిగిలిన కార్టూన్లు ‘మాకేం తక్కువ?’ అంటూ తగూకొచ్చేస్తాయి. అందుకే ఆ ప్రయత్నం విరమించాను!
కార్టూన్లకు వ్యాఖ్యానం అవసరమా?
అవసరమేమీ లేదు. కానీ ఏదైనా మంచి సినిమా చూశాక, దాంట్లో కొన్ని సన్నివేశాలను తల్చుకుని, చెప్పుకుని మరీ సంతోషిస్తుంటాం కదా? అలాగే ప్రతి కార్టూన్ తర్వాతా నే రాసిన నాలుగు ముక్కలు చేరుస్తున్నాను. కార్టూన్ రామాయణంలో ఈ పిడకల వేట ఎందుకనుకునేవారు హాయిగా… నేరుగా బాపూ కార్టూన్లనే ఎంచక్కా ఎంజాయ్ చేసెయ్యండి! వీటిలో
పోకిరి పోజు
వీధుల్లో, ఆఫీసుల్లో అమ్మాయిలను చూసి లొట్టలేసుకు చూసే పోకిరి మగాళ్ళను చిత్రించటంలో బాపుది ప్రత్యేక ముద్ర. అమ్మాయిని చూస్తూ పరిసరాలు మర్చిపోయి గోతిలో అమాంతం పడిపోతున్న కుర్రాళ్ళ కార్టూను గుర్తుందా? ( ‘పక్కకు తప్పుకో, మరోడు వస్తున్నాడం’టూ- గోతిలో అప్పటికే పడిపోయివున్నవాళ్ళలో ఒకడు పక్కవాడితో అంటుంటాడు) .
ఈ కార్టూన్ లో హెడ్డు గుమాస్తా మొహంలో ఎక్స్ ప్రెషన్స్ గమనించండి. కుర్చీ, చెత్తబుట్టా, ఎగిరిపోతున్న కాయితాలూ సరే సరి. కొత్త ఉద్యోగిని అమాయక చూపూ, తాపీగా చెపుతున్న ఆఫీసరు రూపూ!
———————
కాపురం కళ
ఈ కార్టూన్ ని ‘జోకు’గా ఎన్నిసార్లు, ఎంతమందికి చెప్పి నవ్వించానో లెక్కలేదు. ‘మళ్ళీ పడ్డారూ’ అనే పదబంధం అందం చూడండి. ఆమె చిరాకూ, ఆయన నిస్సహాయపు విసుగూ చూసి తీరాల్సిందే!
———————
గృహస్థు అవస్థ
ఆ ఇల్లాలు పాటగత్తె అవతారమెత్తి ఎలుగెత్తి ఆకాశం కేసి చూస్తూ చేసే సంగీత సాధన ఒక ఎత్తయితే…. ఇటుపక్కకు తిరిగి నెత్తిన గుడ్డ వేస్కునీ, పేపర్ ని కసిగా నలిపేస్తూ ఆ గృహస్థు పడే నరక యాతన మరో ఎత్తు. ఎంతకాలం గడిచినా మరపుకు రాని కార్టూన్ ఇది!
———————
గానం… గాత్రం
ఇది కూడా శ్రవణ హింస కార్టూనే. ఆ గృహిణి పాడతానని గోముగా అడగటం, ఆ భర్త పేపర్ నుంచి తలైనా తిప్పకుండా రాబోయే తిప్పలను తెలివిగా తప్పించుకోవటం… (రెండు సార్లూ తగిన కారణాలనే చెపుతూ )- చాలా బాగుంది కదూ?
———————
ఇంటింటి పోట్లాట
couple4.jpg
అతిథి దేవుళ్ళు వస్తారని అంతర్యుద్ధాలు ఆగవు కదా? ఇక్కడ గృహ రణాన్ని కళ్ళారా చూస్తూ ఆనందిస్తూ ఆ చుట్టాల దంపతుల మొహ కవళికలు ఎంతగా వెలిగిపోతున్నాయో చూడండి… ‘బిజీగా ఉన్నట్టున్నారు…’ అనటంలో ఎంతెంత వ్యంగ్య వైభవం!
———————
వంట…తంటా
వంటొచ్చిన మగవాడి అగచాట్లు. కులాసాగా ప్రశ్న అడిగిన పూల చొక్కా మిత్రుడికీ; కూరగాయల సంచీని వీపు వెనక దాచేసి బింకంగా అమాయకంగా జవాబిస్తున్న వ్యక్తికీ మధ్య ఆకారాల్లోని తేడా గమనించారా?
———————
మైకు మైకం
వేదికా… ప్రేక్షకులూ… ముఖ్యంగా మైకు ఎదురుగా ఉంటే రాజకీయ నాయకులకు ప్రసంగావేశం తన్నుకుని రాకుండా ఉంటుందా? ఇక ఆ నిరంతర వాక్ స్రవంతిని ఆపటం ఎవరితరం? ఇక్కడ మైకును లాగేసుకుంటున్న నిర్వాహక వస్తాదుల మొహాల్లోని క్రౌర్యం, విసిగించకుండా విరమిస్తానని సౌమ్యంగా చెపుతూనే మైకును ఉడుంపట్టు పట్టిన నాయకుడి మైకం చూడండి….
———————
గుళిక.. ప్రహేళిక
రిటైరైన ఉద్యోగికి పింఛను కంటే మించి అత్యంత ప్రియమైనదీ, ముఖ్యమైనదీ వేరే ఉండదేమో! వయసైనా, సొగసైనా దానిముందు దిగదుడుపే. ఈ కార్టూన్లో గుళికలను విక్రయించే వ్యక్తివీ, పార్కులో బెంచీలో కూర్చున్న వృద్ధుడివీ ఎక్స్ ప్రెషన్స్ గమనించారా? అద్భుతమైన హాస్యంతో పాటు సహజ మానవ ప్రవృత్తి ఈ వ్యంగ్యచిత్రంలో ఎంతగా ఒదిగిపోయిందో కదా!
———————
పుష్కర పరిచయం
ఇంతటి గొప్ప కార్టూన్ నాకు మరెక్కడా తారసపడలేదు. అచ్చతెలుగు కార్టూన్ ఇది. పుష్కరాల్లో గుంపుగా కలిసివచ్చినవాళ్ళే ఒకరినుంచి ఒకరు తప్పిపోతుంటారు. ‘ఇంకెవరో అనుకుని’ పొరపాటున పలకరించిన వ్యక్తి పన్నెండేళ్ళ తర్వాత పుష్కరాల్లో మళ్ళీ తారసపడటం, ఆ ‘పాత పరిచయం’గుర్తుంచుకుని మరీ పలకరించటంలో ఎంత విచిత్ర చమత్కృతి!
– బాపు కార్టూన్లను పుస్తకాలుగా ప్రచురించిన ‘విశాలాంధ్ర’ సౌజన్యంతో.
great cartoons
సూపర్ కార్టూన్స్
baapu garu the great.
అద్భుత సేకరణ.