రచన: శ్రీసత్యగౌతమి
సూరీడుతో దిశను మార్చుకుంటుంది పొద్దుతిరుగుడు
చంద్రుడు రాలేదని చిన్నబుచ్చుకుంటుంది కలువ రేకు
పగలే వెన్నెల హృదయం ఊయలై పులకరించు తామరలు
రాత్రి వెన్నెల్లన్నీ పట్టి నింపుకొని సువాసించు సిరి మల్లెలు
హరివిల్లు కుంచెలతో రంగులద్దుకొను కనకాంబరాలు
తెల్లటి మేఘాల గాలి సోకి తళుక్కుమను నందివర్ధనాలు
సంజె కెంజాయిల్లో నిక్కబొడుపులు రామబాణాలు
నీలాకాశం అంచున వ్రేలాడే జరీదారాలు నీలికలువలు
అయితే ఏం… గగనసీమన సూర్యచంద్ర గమనాలు
కాస్త సన్నగిల్లితే చాలు ఉసూరుమని సొమ్మసిల్లు
ఏ గమనాలకూ సడలవు…. ఏ రుతువులకూ లొంగవు
స్వర్గాన మధువువని నుండి దేవుని చేజారిన ఈ గులాబీలు
అందమైన ప్రేమలేఖలో అక్షరాలు అది ఒకటి నువ్వు ఒకటి నేను !!