మాలిక పత్రిక

రచన: అప్పారావు, ఖాదర్ ఖాన్ (సురేఖాన్)

 

పాత్రలు: డాక్టరు, పేషేంట్

 

ముక్కుతూ మూలుగుతూ రోగేశ్వర్రావు డా. ధన్వంతరి హాస్పిటల్లోకి ప్రవేశిస్తాడు.

ధన్వంతరి : రావయ్యా! రోగేశ్వర్రావు! బాగున్నావా!!

రోగేశ్వర్రావు: హు! బాగుంటే  మీ దగ్గరకెందుకు వస్తానండి! వళ్ళంతా భరించలేని నొప్పులు. ఈ చూపుడూ వేలుతో తలమీద, చేతిమీద, కాలిమీద, పొట్టమీద, నడుం మీద ఎక్కడ నొక్కినా భరించలేణి నొప్పి, ఇంతకన్నా చావే నయమనిపిస్తున్నది.

ధన్వంతరి : నా దగ్గర కొచ్చారుగా అ అవిషయం నాకొదిలేయండి. నే చూసుకుంటాగా! ఏదీ ముందు మీ వేలును చూడనివ్వండీ. (అంటూ వెలును నొక్కి చూస్తాడు)

రోగేశ్వర్రావు: అయ్య నాయనోయ్! చచ్చాన్రోయ్!

ధన్వంతరి : అంత తొందరే! నే వైద్యం మొదలెట్టందే!!

రోగేశ్వర్రావు: అయితే ఇప్పుడు నా వేలికి కూడా నొప్పి పాకిందన్నమాట. నేనేం చేయన్రోయ్!

ధన్వంతరి : నీ మొహం మండా! నన్ను చెప్పనియ్యవయ్యా… నీ ఒంటికి జబ్బెమీ లేదు. జబ్బల్లా ఈ వేలికే.. వేలు బెణికింది. అందువల్లే ఈ వేలుతో ఎక్కడ నొక్కినా నొప్పెడుతున్నది. సరే ఇంతకీ నీ చెవినొప్పెలా వుంది? మాత్రలిచ్చా వేసుకున్నావా?

రోగేశ్వర్రావు: మీరు చెప్పినట్టే మాత్రలు మూడు, మూడు పూట్లా వేసుకున్నాను. ఐనా నొప్పి తగ్గకపోగా మరింత పెరిగింది.

ధన్వంతరి : ఆ మాత్రలతో నొప్పి తగ్గలేదా! ఏదీ చెవి చూడనివ్వు, (చెవిని చూస్తూ) ఇదేమిటి చెవిలో ఏవిటో వున్నాయి. అదే ఇవి నేనిచ్చిన మాత్రలే. చెవిలోకి ఎలా వచ్చాయి?

రోగేశ్వర్రావు: అదేమిటి? చెవిలోకి ఎలా వచ్చాయ్ అని అడుగుతున్నారు? మీరేకదా చెవినొప్పికి మాత్రలు వేసుకోమని ఇచ్చారు. మూడుపూటలా మీరు చెప్పినట్టే చెవిలో వేసుకున్నాను.

ధన్వంతరి : ఆఁ ఏమిటి? నీ మొహం మండా! చెవిలో వేసుకున్నావా?. నోట్లో వేసుకోవాలయ్యా మహానుభావా.

రోగేశ్వర్రావు: పోదురూ. భలేవారే! ఆ మధ్య నోటిపుళ్ళతో మీ దగ్గరికి వస్తే మాత్రలిచ్చి వేసుకోమన్నారు. వేసుకోగానే తగ్గింది. మరిప్పుడు చెవిపోటంటే చెవిలో వేసుకోక నోట్లో ఎలా వేసుకుంటానండి. నేనంత తెలివితక్కువ దద్దమ్మననుకుంటున్నారా!

ధన్వంతరి : నువ్వెక్కడ దొరికావయ్యా మహానుభావా? సరే నొప్పి తగ్గడానికి ఇంజక్షన్ చేస్తాను. (ఇంజక్షను చేయడానికి రెడీ అవుతుంటాడు)

రోగేశ్వర్రావు: డాక్టరుగారు.. మీ దగ్గర ఇంజక్షన్ చేయించుకోడం ఇదే మొదటిసారి. నొప్పిలేకుండా చేస్తారుగా..

ధన్వంతరి : భలేవాడివే! నేను పాతికేళ్ల నుండి ప్రాక్టీసు చేస్తున్నా తెలుసా! (గర్వంగా కాలరెగరేస్తాడు)

రోగేశ్వర్రావు: అయ్యబాబోయ్! ఏవిటి? ఇంజక్షన్ చేయడం పాతికేళ్లనుండి ప్రాక్టీస్ చేస్తున్నారంటే  మీకింకా ఇంజక్షన్ చేయటం బాగా రాదన్నమాట. బాబూ మాత్రలే ఇవ్వండి. డాక్టరుగారూ. పత్యమేమైనా వుందా? వంకాయ, టమాటా తినొచ్చా?

ధన్వంతరి : బ్రహ్మాండంగా తినొచ్చు.

రోగేశ్వర్రావు: తోటకూర, పాలకూర, మెంతికూర.

ధన్వంతరి : తినొచ్చయ్యా!

రోగేశ్వర్రావు: బెండకాయ, దొండకాయ, దోసకాయ.

ధన్వంతరి : (విసుగ్గా) అబ్బా. అన్నీ తినొచ్చు.

రోగేశ్వర్రావు: కోప్పడకండి. బలానికి జీడిపప్పు, బాదంపప్పు.

ధన్వంతరి : చంపుతున్నావ్ కదయ్యా! నా బుర్ర, గన్నేరుపప్పు తప్ప అన్నీ తినొచ్చయ్యా! చూశావా ఎంతమంది పేషెంట్లు నాకోసం ఎదురు చూస్తున్నారో (సీట్లలోని జనాలను చూపిస్తూ)

రోగేశ్వర్రావు: ఊరుకోండి. ఎవరైనా నవ్విపోతారు. వాళ్ళు మీ పేషెంట్లు కాదండి. నేను హాస్పిటల్‌కు వస్తూ  నాకు తోడుగా తెచ్చుకున్న నా ఫ్రెండ్స్. వస్తా.. (బయటకు వెడుతూ తిరిగి వచ్చి) డాక్టరుగారూ..

ధన్వంతరి : అబ్బా! మళ్లీ ఏమొచ్చింది?

రోగేశ్వర్రావు: ఇంతకీ ఈ మాత్రలు టీతో వేసుకోమంటారా? కాఫీతో వేసుకోమంటారా?

ధన్వంతరి : (తల పట్టుకుంటూ) సారాతో తప్ప దేనితోనైనా వేసుకోవయ్యా! నీలాంటి పేషెంట్లుంటే నా పేరును ధనవంతరిగా కాకుండా రోగవంతరిగా మార్చుకోవడం ఖాయం.

రోగేశ్వర్రావు: డాక్టరుగారు పాపం మీకు బాగా తలనొప్పి వచ్చినట్లు అగుపిస్తున్నారు. ఓ మాత్ర వేసుకుని టీయో కాఫీయో త్రాగండి.

ధన్వంతరి : ఆగాగు. ఫీజు ఏది? క్రితం కీళ్ల నొప్పులకు వైద్యానికి ఫీజు కోసం నువ్విచ్చిన చెక్కు బ్యాంకు నుంచి తిరిగొచ్చింది.

రోగేశ్వర్రావు: దాందేముందండి. మీరు వైద్యం చేసిన కీళ్ల నొప్పి కూడా తిరిగొచ్చిందిగా. వస్తా…

 

??????????????????????????